இந்திய சர்வதேச திரைப்பட விழாவில் பாரதிராஜா, பாக்யராஜிற்கு அஞ்சலி | ராதிகா ஆப்தே சர்ச்சை குறித்து மவுனம் கலைத்த கீர்த்தி சுரேஷ்! | பேசும் மற்றும் கேட்கும் திறனை மீட்டுத் தந்த மம்முட்டி : நெகிழ வைத்த குழந்தைகள் சந்திப்பு | பரத் பாலா - ஏ.ஆர். ரஹ்மான் படம் இந்திய சர்வதேசத் திரைப்பட விழாவிற்குத் தேர்வு | துல்கர் சல்மானின் பிராங்க்கில் மாட்டிக்கொண்ட விஜய் தேவரகொண்டா | நவாசுதீன் சித்திக்குடன் வேலை செய்வது நரகம் போன்றது : நடிகை தியா மிர்சா காட்டம் | தாய்மைப் பொறுப்புகள் குறித்த புகைப்படங்களை பகிர்ந்த பிரியங்கா சோப்ரா! | அறம் பட பாணியில் உருவாகும் வெப்சீரிஸில் நடிக்கும் தபு | தனுஷின் 'ஓம்' படத்தில் தனது கதாபாத்திரம் குறித்து தகவல் வெளியிட்ட ஸ்ரீலீலா! | மகள் ஐஸ்வர்யா பற்றி அவதூறு : கமிஷனர் அலுவலகத்தில் நடிகர் அர்ஜூன் புகார் |

எல்.கே.ஜிக்கு செல்ல வேண்டிய 4வது வயதில் வெள்ளித்திரையில் காலடி எடுத்து வைத்த ‛களத்தூர் கண்ணய்யா' இன்று தனது 72 வது வயதில் காலடி எடுத்து வைத்து தமிழ் சினிமாவின் நம்பர் ஒன் சண்டியராக களத்தில் நிற்பது உலக சினிமாவில் வேறெங்கும் நிகழ வாய்ப்பே இல்லாத அதிசயம்.
ஒரு நடிகன் சினிமாவில் நடிக்கலாம். ஒரு நடிகன் சினிமாவில் வெற்றி பெறலாம். ஒரு நடிகன் ரசிகர்களின் இதயங்களில் இடம் பிடிக்கலாம். ஆனால், ஒரு நடிகனே சினிமாவின் இலக்கணத்தோடு தொடர்ந்து மல்லுக்கட்டி, அதன் எல்லைகளை விரிவுபடுத்தி, ஒவ்வொரு தலைமுறைக்கும் தன்னைப் புதுப்பித்துக் கொண்டு பயணிப்பது என்பது சாதாரணமான விஷயமல்ல. அப்படிப்பட்ட அபூர்வமான கலைஞன்தான் கமல்ஹாசன்!

வெறும் நட்சத்திரமாக மட்டும் வாழ்ந்துவிடாமல், நடிகர், இயக்குநர், திரைக்கதை ஆசிரியர், தயாரிப்பாளர், பாடகர், நடனக் கலைஞர் எனப் பல முகங்களோடு அரை நூற்றாண்டுக்கும் மேலாகத் தமிழ்த் திரையுலகில் இயங்கிக் கொண்டிருப்பவர் கமல்.
வெற்றிகளைக் கொண்டாடிய அதே நேரத்தில் தோல்விகளையும் துணிச்சலோடு எதிர்கொண்டவர். விமர்சனங்களைச் சந்தித்தபோதும் தனது சினிமா மீதான தேடலை ஒருபோதும் கைவிடாதவர். தொழில்நுட்பம் மாறும் போதெல்லாம் அதன் முன்னத்தி ஏராக மாறி பல சாதனைகளுக்கு விதை போட்டவர்.
72 வயதை நோக்கி நகரும் இந்தப் பயணத்தில், கமல்ஹாசனை ஒரு நடிகராக மட்டுமே பார்க்க முடியாது. அவர் ஒரு திரைப்பட பல்கலைக்கழகம். வழக்கமான கதாநாயகர்களைப் போல ஒரே மாதிரியான பாத்திரங்களைத் தேர்ந்தெடுக்காமல், சவாலான கதாபாத்திரங்களைத் தேடிச் சென்றார். ரசிகர்கள் அவரை ஆழ்வார்ப்பேட்டை ஆண்டவர் என்று கொண்டாடியபோது கடவுள் பாதி மிருகம் பாதி என்று வில்லன் வேடத்திலும் வெளுத்து வாங்கினார். சொந்தக் கதைக்கு நெருக்கமான ஒரு படத்துக்கு உத்தம வில்லன் என்று தலைப்பு வைக்க கமலை விட்டால் வேறு யார் இருக்கிறார்கள்?
இங்கே ஒரு விஷயத்தைச் சொல்ல வேண்டும். கமலின் எல்லாப் பரிசோதனைகளும் வெற்றி பெற்றுவிடவில்லை. சில படங்கள் எதிர்பார்த்த வரவேற்பைப் பெறவில்லை. சில முயற்சிகள் வணிக ரீதியாகப் பெரும் சவால்களை ஏற்படுத்தின.

ஆனால், ஒரு தோல்விக்குப் பிறகு மீண்டும் அதே பாதுகாப்பான பாதைக்குத் திரும்புவதற்குப் பதிலாக, அடுத்த முயற்சியை நோக்கிச் செல்வதுதான் அவருடைய தனித்தன்மை. நடிகராக மட்டுமே சினிமாவில் இருக்க வேண்டும் என்று கமல் நினைக்கவில்லை. தனது சினிமா கனவுகளைச் செயல்படுத்துவதற்காக தயாரிப்புத் துறையிலும் தீவிரமாக இறங்கினார். ராஜ்கமல் பிலிம்ஸ் இன்டர்நேஷனல் நிறுவனத்தின் மூலம் பல முக்கியமான படங்களைத் தயாரித்தார்.
ராஜபார்வை, சத்யா, அபூர்வ சகோதரர்கள், தேவர் மகன், குருதிப்புனல், விருமாண்டி, விஸ்வரூபம் எனப் பல்வேறு வகையான படைப்புகளுடன் இந்த நிறுவனம் தொடர்புபட்டுள்ளது. கமலின் தயாரிப்புகளில் ஒரு பொதுவான அம்சம் இருக்கிறது. அன்றைய காலகட்டத்தின் வழக்கமான வணிகச் சூத்திரங்களைத் தாண்டி, புதிய கதைகளையும் தொழில்நுட்பங்களையும் முயற்சி செய்ய வேண்டும் என்ற ஆர்வம்.

குருதிப்புனல் படத்தின் ஒலி வடிவமைப்பு, விருமாண்டியின் திரைக்கதை அமைப்பு, விஸ்வரூபத்தின் சர்வதேசத் தரத்திலான ஆக்ஷன் வடிவமைப்பு எனப் பல இடங்களில் அவரது தொழில்நுட்ப ஆர்வத்தைப் பார்க்க முடியும்.
தமிழ் சினிமாவில் புதிய தொழில்நுட்பங்களைப் பரிசோதிக்க வேண்டும் என்று தொடர்ந்து வலியுறுத்தியவர்களில் கமல் முக்கியமானவர். ஒப்பனைத் தொழில்நுட்பம், ஒலிப்பதிவு, எடிட்டிங், காட்சியமைப்பு, கேமரா தொழில்நுட்பம், திரைக்கதை வடிவமைப்பு எனப் பல துறைகளிலும் அவருக்கு ஆழமான ஆர்வம் உண்டு.
1980-களிலேயே தொழில்நுட்ப ரீதியாக வித்தியாசமான முயற்சிகளை மேற்கொண்டார். டிஜிட்டல் முறையில் ரிஸ்க் எடுத்த ‛மும்பை எக்ஸ்பிரஸ்', குருதிப்புனல் படத்தில் பயன்படுத்தப்பட்ட ஒலித் தொழில்நுட்பம், தசாவதாரம் படத்தின் ஒப்பனை முயற்சிகள், விஸ்வரூபம் படத்தின் ஒலி மற்றும் காட்சியமைப்பு ஆகியவை அதற்கான உதாரணங்கள்.
2013-ல் வெளியான விஸ்வரூபம் படத்தை உருவாக்குவதிலும், அதன் வெளியீட்டு முறையிலும் அவர் மேற்கொண்ட முயற்சிகள் அன்றைய தமிழ் சினிமாவில் பெரிய விவாதத்தை ஏற்படுத்தின. டிஜிட்டல் தொழில்நுட்பம், திரைப்பட வெளியீட்டு முறை, உலகத் தரத்திலான தயாரிப்பு ஆகியவற்றில் அவர் கொண்டிருந்த ஆர்வம் பல நேரங்களில் சர்ச்சைகளையும் எதிர்ப்புகளையும் சந்தித்தது. ஆனால், அந்த எதிர்ப்புகள் அவரது தேடலை நிறுத்திவிடவில்லை.

கமல்ஹாசனின் கலைப்பயணத்துக்கு தேசிய அளவிலும் சர்வதேச அளவிலும் பல அங்கீகாரங்கள் கிடைத்துள்ளன. மூன்று முறை சிறந்த நடிகருக்கான தேசிய விருதைப் பெற்றிருப்பது அவரது நடிப்புத் திறமைக்குக் கிடைத்த மிகப்பெரிய அங்கீகாரம். அவருக்கு ஆஸ்கர் அதிக தூரத்தில் இல்லை. ஆனால், கமலுக்கு விருதுகளைவிட முக்கியமானது அடுத்த படத்தில் என்ன புதிதாகச் செய்யலாம் என்பதுதான் என்று அவரது திரைப்பயணத்தைப் பார்க்கும்போது புரிந்துகொள்ள முடிகிறது.
கமல்ஹாசனைப் பற்றிப் பேசும்போது அவரது நடிப்புத் திறமை மட்டுமே நினைவுக்கு வருவதில்லை. அவரிடம் இருக்கும் சில தனித்துவமான குணங்கள் அவரை மற்றவர்களிடமிருந்து வேறுபடுத்திக் காட்டுகின்றன.
முதலாவது - கற்றுக்கொள்ளும் ஆர்வம்.
ஆறு தசாப்தங்களுக்கும் மேலாக சினிமாவில் இருந்தாலும், இன்னும் கற்றுக் கொள்ள வேண்டிய விஷயங்கள் நிறைய இருக்கின்றன என்ற மனநிலையோடு செயல்படுபவர்.
இரண்டாவது - தோற்றத்தைப் பற்றிய கவலையின்மை.
கதாபாத்திரத்துக்குத் தேவையென்றால் தனது தோற்றத்தையே மாற்றிக்கொள்ளத் தயங்குவதில்லை. அப்பு, அவ்வை சண்முகி, சேனாபதி, தசாவதாரத்தின் பத்து கதாபாத்திரங்கள் என இதற்குப் பல உதாரணங்கள் இருக்கின்றன.
மூன்றாவது - தொழில்நுட்பத்தின் மீதான காதல்.
சினிமா என்பது நடிப்பை மட்டுமே சார்ந்த கலை அல்ல; அதன் பின்னால் இருக்கும் தொழில்நுட்பங்களையும் அறிந்திருக்க வேண்டும் என்று நம்புபவர்.
நான்காவது - துணிச்சல்
ஒரு முயற்சி வெற்றியடையுமா இல்லையா என்று யோசித்து நின்றுவிடாமல், தனக்குப் பிடித்த கதைகளையும் கதாபாத்திரங்களையும் உருவாக்க முயற்சிப்பவர்.

அவரது வாழ்க்கையைத் திரும்பிப் பார்த்தால் ஒரு விஷயம் புரியும். சினிமா அவருக்கு ஒரு தொழில் மட்டுமல்ல. அது அவரது வாழ்க்கை. அவரது காதல். அவரது தேடல். சில நேரங்களில் அவரது போர்க்களமும்கூட!. எத்தனை இடையூறுகள் வந்தாலும் அவற்றோடு முட்டிமோதி விளையாடும் சண்டியர்தான் கமல்.
இன்று தனது 72 வது பிறந்தநாளில் அவர் அறிவித்திருக்கும் 'சண்டியர்' படமே அதற்கு சாட்சி. 23 ஆண்டுகளுக்கு முன் இதே தலைப்பை 'விருமாண்டி' படத்துக்காக கமல் அறிவித்தபோது எழுந்த சர்ச்சைகள் மீண்டும் எழத் தொடங்கியிருக்கின்றன. இம்முறை அவரே ஒரு அரசியல்வாதியும் கூட என்பதால் அரசியல் சூழ்ச்சிகளை எப்படி வெல்வதென்று அவருக்குத் தெரியும்.
திரைக்கலைஞன் கமலுக்கு நீங்களும் உங்கள் பிறந்தநாள் வாழ்த்தையும், அவரது பிடித்தமான படங்களையும் கீழே கமென்ட்டில் சொல்லுங்க...!




